prosody | miscellaneous |
Tres enemics e dos mals seignors ai, C'usqecs poigna nuoig e jorn cum m'aucia: L'enemic son miei oill e-l cors, qe-m fai Voler celliei c'a mi non taigneria! E l'us seigner es Amors, q'en baillia Ten mon fin cor e mon fin pessamen, L'autre etz vos, dompna en cui m'enten, A cui non aus mon cor mostrar ni dir Cum m'aucietz d'envej'e de desir. Que farai doncs, dompna, que sai ni lai Non puosc trobar ren ses vos que bo-m sia Que farai ieu, cui serion esglai Tuich autre joi si de vos no-ls avia Que farai ieu, cui capdella e guia La vostr'amors e-m fuich e-m sec e-m pren Que farai ieu, c'autre joi non aten Que farai ieu ni cum poirai gandir, Si vos, dompna, no-m voletz retenir Cum durarai ieu, que non puosc morir, Ni ma vida no m'es mas malanansa Cum durarai ieu, cui vos faitz languir Desesperat ab un pauc d'esperanssa Cum durarai ieu, que ja alegransa Non aurai mais, si no me ven de vos Cum durarai ieu, que ieu sui gelos De tot home qui vai vas vos ni ve E de totz cels a cui n'auch dire be Cum viurai ieu, que tant coral sospir Fatz nuoich e jorn que movon de pesanssa Cum viurai ieu, cui non pot far ni dir Autra ses vos ren qe-m teigna ad honranssa Cum viurai ieu, c'als non port e membranssa Mas vostre cors e las plazens faissos E-ls cortes digz humils e amoros Cum viurai ieu, que d'als non prec de me Dieu mas qe-m lais ab vos trobar merce Que dirai ieu, dompna, si no-m mante Fina merces, sivals d'aitan qu'eu venssa Ab mon fin cor et ab ma leial fe Vostra rictat e vostra gran valenssa Que dirai ieu si vos no-m faitz suffrensa Qe dirai eu, c'autra non puosc vezer Q'en dreich d'amor mi puosca al cor plazer Que dirai ieu, c'autra el mon non es Qe-m dones joi per nuill ben qe-m fezes A la valen comtessa de Proenssa, Car son siei fatch d'onor e de saber E-il dich cortes e-il semblan de plazer, An ma chansos, car cella de cui es, Me comandet c'a lieis la trameses. |