Main PageTroubadours' ListingMore Works by Uc de St. Circ

The prosody guide is available as a book. Click here for details.

Antan fez coblas d'una bordeliera
Ser Aimerics e s'en det alegranza,
Et aras auch q'en una lavandiera
A mes son cor e tota sa esperanza!
Q'aissi s'aven d'ome q'es trop dios,
Qe sos affars torna de sus en jos
Quant veillesa lo rom ni desbalanza.

Ja toseta no-il er mais lausengiera
Ni no-ill dira lausengas ni honranza!
Et si o fai, fara o per nessiera
Qu'aura en si, e per grant malananza!
E faill li ben pans, vins, sez e maisos
A leis, s'ab si lo colga ni-s met jos
Ni abracha sa fronzida pel ranza.