Main PageTroubadours' ListingMore Works by Uc de St. Circ

The prosody guide is available as a book. Click here for details.

Una danseta voil far
Jogan risen
De Ma Vida, cui Deus gar
Son gentil sen,
A qe-il farai alegrar
Son cor dolen.
Ab dous chan
En dansan
Voil que s'anes conortan,
Baratan
E trichan
La domnas e galian.

Sos bons sens li fai canjar
Alberg soven,
Car es venguz sai estar
E vai qeren
Autra que puesc' enganar
C'aia argen.
Ab dous chan
En dansan
Voil que s'anes conortan,
Baratan
E trichan
La domnas e galian.

Mantoana e Verones,
Perdut l'ai,
E Trevis' e Senedes
Atresi sai,
E se-l perc Visentines
O-l menerai
Ab dous chan
En dansan
Voil que s'anes conortan,
Baratan
E trichan
La domnas e galian.

En Alvergne et en Fores
Et en Veslai,
Lai on no sabon qi s'es
Ni-ls trag q'el trai!
Pueis me trai l'en Vianes,
A Anonai.
Ab dous chan
En dansan
Voil que s'anes conortan,
Baratan
E trichan
La domnas e galian.