home page ?


Aissi cum es coinda e gaia
E cortesa e plazens
Ed azaut' a totas gens
La bella de cui eu chan,
M'es ops que d'aital semblan
Cum ill es fassa canso,
Coinda e gaia ab plazen so,
Que li man lai que-l an dire
Lo desire
Que ieu ai
De vezer son gent cors gai.

Desir n'ai ieu e cossire
E pessamen e esglai
Car non la vei, et esmai!
C'anc nuilla sazo non fo,
S'ieu vis sa gaia faisso,
Que anc trebailla ni dan
Sentis ni mal ni affan,
Aitant doussamen m'apaia
Qanz q'ieu aia
De turmens
Sos francs cars humils parvens.

Ja no-s cuit qez eu m'atraia
Vas autra, qe-ls cors e-l sens
E-l desirs e-l pessamens
Si acordon d'un talan,
C'usquecs la vol e la blan,
Car ges oblidat non so
L-dig ni-l faich ni-l si ni-l no
Ni-l beil semblan ni-l doutz rire
Ni-l sospire
Ni l'essai
Ni-l doutz man ni-l plazen plai.

Sos amics e sos servire
E sos hom sui e serai,
E dompna vista non ai
Nuill luoc, ni sai on eu so,
Que mais de lieis un cordo
Non ames o sol un man,
Qu'ieu sai preses de joi tan
Cum pren cel que si donz baia
Ni qe-i jaia,
Que cozens
M'es totz autres gauzimens,

Ges per l'avol gens savaia
Cui desplatz jois e jovens,
Ni per los mieus malvolens
Que van mos mals encercan
No m'an mon joi amerman!
Anz li dic que per razo
Deu per els voler monpro,
C'om deu faire don s'azire
E que tire
A cels lai
A cui sos plazers desplai.

Dalfin, de clara razo
Ai er faicha ma chansso,
Per so que puosca eslire
E devire
Cum eu ai
Vas lieis mon fin cor verai.