| |
|||
| prosody | miscellaneous |
Servit aurai longamen Humils, francs, sers e leials Amor, don ai pres grans mals, Ira, pena e tormen, Greu maltraich ses nuill' esmenda! Et ancar vol q'ieu atenda Amors sa dura merce, Per saber si n'aurai be Suffren anz c'altrui mi renda. Amarai doncs finamen, Puois fis amars no m'es sals Non ausaria esser fals Vas lieis c'aisi-m vai volven Conseill m'es ops q'ieu en prenda.-- Mas Amors ditz q'anz mi penda Qe ja li menta de re.-- Mas dreitz es c'ab aital fe Cum ill compra q'ieu li venda. Mas ges vas lieis no-m deffen Razos, dreitz, amors ni als, E si-l platz mos dans mortals E lo sieu qier eissamen, Non creza q'ieu l'o contenda, Qu'eu viu de paubra prevenda! Que non ai poder en me, Car cill l'a c'a-l cor ab se, E no voill qu'om li-m deffenda. Esfortz fatz doncs car m'enten, Ni car i perc mos jornals, En lieis, don vista sivals Ni pres ni loing non aten, Si doncs no-il platz que s'estenda En lieis merces e-i dissenda! Esser pot, mas non o cre, Car qui-ls mieus mans non rete Non par que los sieus me tenda. Huoills clars ab boca rizen, Denz plus blancas c'us cristals! Neus blanca non es aitals Cum sos cors rics de joven! Blanca, vermeilla, ses menda Es la cara sotz la benda! Tot hi es cant i cove, Honrada sor tota re, Si que no-i ha c'om reprenda. De ma vida-m faitz esmenda, Bella de dura merce, Ab sol que soffratz de me Qu'eu per vos al cel entenda. A-n Savaric, part Enenda, Chanssos, vai dir de part me Qez el sabra ben, si-t ve, Se-il taing que fuga o atenda. |