Main PageTroubadours' ListingMore Works by Uc de St. Circ

The prosody guide is available as a book. Click here for details.

Nuills hom no sap d'amic, tro l'a perdut,
So que l'amics li valia denan!
Mas quan lo pert, e pois es a son dan
E-il notz aitan cum l'avia valgut,
Adoncs conois que l'amics li valia!
Per q'ieu volgra ma dompna conogues
So q'ieu li vaill, ans que perdut m'agues,
E ja pueissas al sieu tort no-m perdria.

Ben sai que s'ieu l'agues aitan nogut
Cum l'ai valgut e son pretz traich enan,
Ben agra dreich qe-m volgues mal plus gran
C'a nuilla re! per qu'ieu ai conogut
De ma dompna que mais mi nozeria
Ab leis lo mals no m'en valria-l bes!
Per qe-m fora fort bon, si ieu pogues,
Que m'en partis, mas per Deu non porria,

Que s'amors m'a si doussamen vencut
Que ieu non posc ni n'aus aver talan
Que ja de lieis que m'auci desiran
Parta mon cor ni l'en vir ni l'en mut,
Anz s'i enpren e s'i ferma qec dia!
Per qe feira chausimen, si-l plagues,
Mas tant sui sieus, si per sieu mi tengues,
Puois fezes en cum del sieu a sa guia.

Amors, tant ai vostre voler volgut
E tant ai faich lonc temps vostre coman
C'anc no-m trobetz en re vas vos tiran!
De tant ric ben cum m'avetz covengut
Dessetz m'en un anz que del tot mortz sia,
Q'en tot lo mon non es tant petitz bes,
Amors, que, sol de ma dompna-m vengues,
Que no-m des joi e no-m tolgues feunia.

S'ella no-m val, ja autra no m'ajut,
Ni m'acoilla ni-m fassa bel semblan,
Car, s'il no-m vol, autra joi non deman,
Ni si-m volia Amors faire son drut!
De nuill' autra ges ieu non o penria,
E, si-n lieis faill, dic que amors non es
Ni chausimens ni bontatz ni merces
Ni franquesa el mon ni cortesia.

En Savaric, ges m'amor non partria
De mon Amic per ren c'om m'en disses
Entro que ieu de ver proat agues
Si es vertatz aisso c'om m'en diria.