home page ?


Lo plus iraz remaing d'autres chatius,
Penrai comjat de joi e de chansos:
Amics Badocs, bels compainhs amoros,
Per vostra mort metrai e nonchaler
Joi e solatz e alegrar e chan!
E can de vos dic ren mas en ploran,
Tuta gens, cuit, m'o dei' a mal tener.

Ai douz compaings, viaz vai vostre brius
Eu remaing sai marriz e consiros,
Teing me per sols ab autres compagnos.
Sabri' eu doncx, ses vos, solaz aver
Non ieu, per Crist, ans vos pliu, ses engan,
Que, s'eu saubes per un li mort se-n van,
Los vius laissera per vos a veszer.

Ja-m diziaz, Badocs, quant eraz vius:
Quals que primers moris se d'ambedos
Parles ab l'autr'. o ja tengr'eu a vos
Cossi-us en poc morz ni alres tener
Quar no-m sones quant vos vic en somjan
Ja-us soner' eu er ai dit fallir gran:
Amix, ben sai: vos no-n aves poder.

Francx cavalers, pros e nominatius,
Savis e fols, humils et orgoilos,
Cars e metens, e creissens e ghastos--
Q'anc hom ves prez tant vil non tenc aver--
De cortes ja fos flors, al mieu senblan,
Ricx de bos aibs, qu'anc nuls hom no-n ac tan!
Greu seira mais hom del vostre valer.

Bels Signier Dieus, Reys glorios e pius,
Per Te meszeis mercejans, piatos,
Reys de merce, al fort jorn perilhos
Laissa nos ambs en paradis vezer:
Mal o faran sains Peir' e sains Johan
Si-l no meton lai on li-angeil estan,
C'anc tan cortes non tengron en poder.