Main PageTroubadours' ListingMore Works by Guillem de St. Deslier

The prosody guide is available as a book. Click here for details.

Pois tant mi forss' Amors que m'a faich entremetre
C'a la genssor del mon aus ma chansson trametre,
E pois non auz aillors mon fin cor esdemetre,
Ben deuri' enplegar mon sotil sen e metre
Si-l plagues qe-m laisses en son servizi metre
Cill cui hom liges sui ses dar e ses prometre.

Lo prometr' amer' ieu, e fos falsa-l promessa,
Mais que s'autra del mon m'agues joia tramessa!
E si neguna s'es de m'amor entremessa,
Entenda-s en autrui, q'ieu sec dreit' esdemessa:
Mon ferm voler ves tal que, si-m sal sains ni messa,
Eu no-il aus descobrir qe-i aia m'amor messa.

Messa-i ai tant m'amor que no m'en puosc estraire
Ni nuill' autra del mon no-m pot gran joi atraire,
Estiers que ren no-il dic ni no li aus retraire
Mas tant q'en mas chanssos dic aital contratraire
Si qu'il sol' o enten com non pot plus mot traire
Per paor d'envejos que la-m cujon forstraire.

Fortraich m'a si mon cor non sai vas on m'i teigna:
Ni partir no m'en puosc ni cuich que ja-i ateigna,
Pero d'aitant la prec, s'a lieis platz, qe-m manteigna:
No-ill enoi s'en dic ben ni a mal no s'o teigna,
Et aissi sofrirai tot so que m'en aveigna
E puois aurai respieich que per Merce-m reteigna.

Retener non puosc mais lo desir ni esbatre
C'a totz jorns creis e nais e no-l puosc escombatre!
Trop m'i fetz en fols plais mon ferm voler desbatre,
Mas negus hom non pot cor destreigner ni batre.
Que farai doncs s'ieu l'am e no la puosc abatre:
Languirai desiran c'ab lieis no-m puosc combatre.

Combatre no-l pot hom qe-il gensser e-il mieills faita
Es que sia el mon e que genseitz afaita
Tot cant taing a bon pretz, que ren non desafaita!
Per que sa grans valors non deu esser desfaita,
E s'Amors es en luoc mespresa ni mesfaita
Sol que la fass' amar es enders' e refaita.

Refaitz for' e reders s'ila-m deignes emprendre
Un jorn qez ieu la vis e-m fezes desaprendre
Lo mal q'ieu trac per lieis que nuills non pot aprendre,
Que non i a negun que s'i auses reprendre.
Mas tant vei son ric pretz per tot lo mon perprendre
Q'en lieis es lo chausitz cui qe-is vol si pot prendre.

Amics Bertrans, Bertrans ben fari' a mesprendre:
Si-l messoigna fos vers aillors feir' ad aprendre.