Main PageTroubadours' ListingMore Works by Guillem de St. Deslier

The prosody guide is available as a book. Click here for details.

Aissi cum a sas faissos
Dieus, del tot Creaire,
Fetz lo premier paire,
Fon pueys lo Reys glorios
Hom carnals, de peccatz blos,
Natz de verge maire!
Fo natz atressi quo nos
Per so que ses tot' erransa
Fos crezut qu'a sa semblansa
Nos fetz lo francs Senher bos.

Mout hi a d'autras razos
Qu'ieu non dic ni -sclaire
Per que-l Guovernaire
De tot quant es sus ni jos
Volc que fos faitz ses pairos
Lo premiers peccaire.
Mas tot quan vol nos es pros,
So crezem e-i am fizansa,
E-ns mostret per demonstransa
Qu'era Dieus totz poderos.

Tant es cars e vertuos
En tot son afaire
E tan debonaire
Lo francs Reys meravelhos
Per que verayas razos
Pot hom ben retraire
Qu'ab devinas orazos
En la preveyral sagransa
Torna lo pas ses duptansa
Sa carns que pres mort en cros.

Doncs, per qu'es nulhs dom duptos
Que-l verays Salvaire
Non pogues filh traire
D'un verge cors precios
Ses assag que fagz no-y fos
D'ome be-s poc faire
Pus tost que quant us limos
De terra venc en mudansa
D'ome per forsa d'obransa
Del Senhor piatados.

Ma fes e m'entencios
Me valh' e-l vejaire
Que-m fan enan traire
Los fagz de Dieu e-ls sermos,
Qu'ieu conosc ben qu'aondos
No-y suy, mas estraire
No m'en puesc: tan volentos
Suy de dir Sa gran honransa,
E, s'ie-y fatz outracujansa,
Valha mi lo Sieus perdos.

Vers Dieus, faitz mi tan d'onransa
Que Vostra belha semblansa
Veya m'arma pres de Vos.