| |
|||
| prosody | miscellaneous |
Bel m'es oimais qu'eu retraja Ab leugieira razon plana Tal chanson que cil l'entenda A cui totz mos cors s'aclina, Q'en la soa desmesura Mi part de si e-m desloigna! Tant m'es de merce estraigna Que no-l platz que Jois m'en veigna. Non sai si-m muor o viu o veing O vau, c'a mal seignor estraing Serv que no-m met neus terme loing Que ja jorn vas me s'amesur. Et on ieu plus l'estau capcli, Negun de mos precs non enten, Anz sai qe m'aucirant de pla Li ben c'om de lieis mi retrai. Trop si feing vas mi veraja, Car una promessa vana No-m fai tal don re non prenda! Non volgra qe-m fos tant fina: Coitos fa-m e long' endura Ai per lieis on met ma poigna! Entro que vas mi s'afraigna Non er jois que ja-m reveigna. Pero per un respieich reveing, Car pens que gentils cors s'afraing Qui-l quier merce, per q'ieu i poing Et aten lo joi don endur. Mans jointas li-m rend ab cor fi, E sapcha ben aitan, si-m pren, Q'anc mieills amic ses tot cor va Non ac dompna, ni plus verai. Sol aitan de merce m'aja, Car es de pretz sobeirana, Qe-ls cuitz q'ieu cuidiei mi renda! E puois ill non o devina Metrai m'en en aventura, E gart m'en Dieus de vergoigna, Q'en cor ai que li-m complaigna Com per sieu lige-m reteigna. Dieus vuoilla, puois aillors non teing Ni vas autra part no-m complaing, Si-l qier merce, que no-m vergoing O c'Amors d'aitan m'aventur Q'alz envejos qe-is fant devi Fassa cuidar q'ella me ren Lo ric joi valen sobira Don ren mas lo desir non ai. Mortz vau vius si no-m meillura Si c'al leial joi m'i joingna, Q'ieu non ai poder remaigna Ab autra, si tot no-m deigna. Bertran, ges per aisso no-m deing Nuill' autra, c'ab midonz remaing On rics pretz e beutatz si joing E non es jorns que non meillur. |