Main PageTroubadours' ListingMore Works by Guillem de St. Deslier

The prosody guide is available as a book. Click here for details.

El mon non a neguna creatura
Non truep sa par, mas yeu non truep la mia
Ni ges no sai on ja trobada sia
Qu'aissi ames per lial fe segura!
Qu'ieu am pus fort selieys que mi guerreya
No fai nulh drutz lieys qu'en baizan s'autreya!
Pus mal grat sieu l'am e que-m fai maltraire
S'ilh m'ames re, pensatz s'ieu l'ames guaire

Ho ieu, sapchatz que no fora mezura,
Pus er l'am tan que m'es mal' enemia!
E s'ieu l'am sols, est' amors que m'embria
Si fai, sivals tan cum bos respiegz dura,
Aquest respiegz on hom res non espleya
Non es cauza que hom persegre deya,
Ben o conosc. si m'en pogues estraire
Mas no puesc ges, tan suy lials amaire.

Be-m volgra mal si-l fezes forfaitura
Ni-l agues dig nul erguelh ni falsia,
Mas quar enans son ric pretz quascun dia
De mon poder e-m platz quan se melhura
E fas saber qu'a totas senhoreya,
Quant ieu l'esguar, no fai semblan que-m veya.
A totz autres es franqu' e de bon aire,
Mas a mi sol no vol belh semblan faire.

Quar costum' es que domna sia dura
E port erguelh selhuy que s'umilia
Belha res mal', e co-us falh cortezia
Ves mi tot sol, qu'autre no s'en rancura
Voletz mi mal sol quar mi faitz enveya
E quar vos am mais d'autra res que seya
Per aquest tort mi podetz los huelhs traire,
Que ieu ni vos non o podem desfaire.

A totz jorns creys e dobl' e s'asegura
L'amors qu'ie-l port, mas bos fagz desembria,
E meynhs n'aurai, so cug, a la partia
Qu'al comensar! vey, qu'ades se pejura,
Que, s'ieu m'irays, de tot en tot sordeya!
Doncx no sai ieu de qual guiza m'esteya:
S'ira mi notz e patz no mi val gaire,
Si -naissi-m vay be suy doncx encantaire.

Amicx Bertrans, vos que es gualiaire
Es mays amatz qu'ieu que suy fis amaire.