| |
|||
| prosody | miscellaneous |
Estat aurai estas doas sazos Que non chantei, e faz i mon dampnatge! Mas er m'agr' ops bos vers o tals chanssos C'azautes lieis cui faz lig' homenatge Et a-m tengut depuois son pretz auzic Que ren no-n ai mas sol lo bon esper Que, sivals res si la pogues vezer, Ab sol l'esgart mi pogr' ill faire ric. Ab sol l'esgart qe-m mostres amoros M'agr'il tan faich! per qu'ieu dic gran outratge :que lo sieus cors es tant valens e bos Que se-i enten cre que fatz gran follatge: Dompna, s'anc hom per sobramar faillic No m'en devetz per orgoillos tener: Mains n'a el mon ab aqel eus voler, C'anc mi ni lor fors las denz non eissic. E pois tant eis vostre pretz cabalos Be-i-s taing, dompna, c'aiatz en seignoratge Un trobador qe-us chan de pla-n perdos, Que l'o deignetz tener en agradatge: Aquel sui ieu qez anc plus no-us qeric E, s'ieu dic ben, qe-us vengues a plazer, O, si que non, que m'o fassatz saber, Puois pendetz mi s'ieu ja mais cansson dic. Cansson non dic, dompna, mas endreich vos A cui non aus trametr' autre messatge Mas los sospirs q'ieu fatz de genoillos, Mas mans jointas, lai on sai vostr' estatge! Q'el mon non ai tant mortal enemic Ab cui trobes o aize o lezer Q'ieu vos pogues cubertamen vezer: Anc a seignor mieills de cor non servic. Si per servir fos tant aventuros C'Umilitatz fraisses tant son paratge Q'us doutz ales del sieu gen ris mi fos Dolsetamen intratz e mon coratge: Si anc nuills hom per ben-amar fenic, Eu fenira si-m pogues eschazer, Mas per respieich q'ieu pogues mais aver Visquer' ieu pois ben leu al ver afic. Un fol afic ant pres ist envejos Encontr' Amor, e fant gran vilanatge: S'una dompna lauzatz que s'era pros Clamaran vos feignedor, per usatge. Ges no m'en feing, mas depuois anc la vic Voill sas onors e son pretz captener, Si fatz d'aitan c'autra non a poder Qe-m don cel joi qu'anc plus fort m'abellic. Lo majer jois qu'anc en mon cor sentic Fon en durmens q'ieu somnhava un ser Que-m laissava sas mas nudas tener. Murir cugei de joy quan m'esperic. Amics Bertrans, digatz Bertran qu'eu dic: Trop s'i venguet si-l vengues a plazer E del sieu tort lais ma merce vezer C'uoill no fant ren a cel qui no la vic. |