Main PageTroubadours' ListingMore Works by Guillem de St. Deslier

The prosody guide is available as a book. Click here for details.

En Guillem de Saint Deslier, vostra semblanza
Mi digatz d'un soin leugier qe-m fo salvatge:
Qu'ieu somjava, can l'autr'ier en esperanza
M'adurmi ab lo salut d'un ver messatge,
en un vergier plen de flors
frescas, de bellas colors
on feri unz vens isnels
qe frais las flors e·ls brondels.

Don, d'est sompni vos dirai, segon m'esmanza,
Q'eu en conoisc ni m'es vis en mon coratge:
Lo vergiers, segon q'en penz, signifianza
Es d'Amor, las flors, de domnas d'aut paratge,
E-l venz, dels lauzenjadors,
E-l bruiz, dels fals fegnedors,
E la frascha dels ramels
Nos cambi' en jois novels.

En Guillem, un arbre vi d'estragna guiza
Deguizat mais de colors c'om non sap pegnier!
Aqel fer tan fort lo venz e fraing e briza
La genzor flor q'em folla la fait estregnier,
E vi mai: d'un surigier
En l'air' un astor gruyer,
Con un falco montargi
C'ab una grailla fai ni.

Don, l'arbres qe vos lai vist, es domn' en guiza
Qi laissa grant part de gent de s'amor fegnier,
E la flors qe vos lai vist el ram asiza
Es domna qe granz crimz baiss' e fai estregner,
E-l vezins del surigier
Drutz qe fan amar dinier,
E del falcon atressi
Drutz valenz que lai s'aizi.

En Guillem, una flor lai vi bell' e blancha
Qe vas totas partz respland e segnoreja!
Aqi lo venz non fer ges, mas se restancha,
Ni-l flors no-i pert sa valor ni rams no-s pleja!
Cujei montar lai on fon
E vi lonc leis un leon
Et environ no sei qanz
Veltres e lebrers renanz.

Don, la flor qe vos lai vist es domna francha
On beutatz e pretz e joia segnoreja,
On malvestatz non fer ges, mas se restancha,
Cui cobeitatz d'Amor eus non fai enveja,
E li veltre d'eviron,
Malvatz lauzengier fellon,
E-l lions, gelos bruianz
Per qe nos moc l'espavanz.