home page ?


L'autrier cavalcava
Sus mon palafre,
Ab clar temps sere,
E vi denan me
Una pastorella,
Ab color fresqu'e novella,
Que chantet mout gen,
E disia en plaingnen:
Lassa mal viu qui pert son jauzimen

Lai on il chantava
Virei tost mon fre,
Et il levet se,
La soa merce,
Vas mi mout isnela,
La franca res bon'e bella,
Et eu mantenen
Desmontei per onramen
De leis que-m fetz tan bel acuillimen.

--Tosa de bon aire,
Dis eu ses temer,
Prec que-m digas ver,
Si-us ven a plazer,
Quegna chansos era,
Cella que disiatz era,
Quant eu vinc aissi!
Quar anc mais, so vos afi,
Tan ben chantar pastora non auzi.

--Seingner, non a gaire
Qu'eu soli'aver
A tot mon voler
Tal que-m fai doler,
Car non l'ai enquera,
Mas il m'oblid'e s'esfera
Per autra de mi!
Per qu'eu planc! et atressi
Chan c'oblides la dolor que m'aussi.

--Tosa, ses faillensa,
Vos dic atrasag
Que atretal plag,
Com a vos a fag
Aquel que-us oblida,
M'a fag una deschausida
Qu'eu amava fort.
Era m'oblid'al sieu tort
Per un autre, qu'eu volri' aver mort.

--Seingner, mantenensa
Trobas del forfag
Que-us a fag tan lag
La fals'ab cor frag!
E ve-us m'en aizida,
Que-us am a tota ma vida,
Si-m n'es en acort,
E tornem lo desconort
C'avem avut en joi et en deport.

--Franca res grazida,
Ma voluntait n'ai complida,
Si-m n'es en acort
De vos, que-m faitz a bon port
Venir joios de tot perilh estort.

--Seigner, ses faillida,
Estorta m'a e guerida
Vostr'amors, tan fort
Que de nuill mal no-m recort,
Tan gen m'aves tot mon mal talan mort.