prosody | miscellaneous |
N'Elias, a son amador A dig una domna qu'eu sai: Bels amics, un prejador ai, Bon e bel e de gran valor, Et am lo tan que ses cor d'autr' amor Lo voill colgar sol una nuoitz ab me, E voillatz ho, que-us ho quier per merce. Digatz mi doncs, pois el si garda'n tan Qu'il lo preia, s'es dreitz que-ill o coman. Cosin, sitot l'en fa paor La domna, ja eu non creirai Qu'o diga mas per plan essai S'ama tant que fezes follor. E si l'amics l'autreia ses clamor So qu'il li quier francamen et ab be, El n'aura grat et il no-n fara re, E s'il o vol aissi con fai semblan, S'el l'o defen, doblar n'a son talan. N'Elias, a lausenjador Datz conseill tal cum el s'eschai, Que ten per be lo mal qu'el fai A sa domna et a son seingnor! Mas ieu li gart leiautat et honor E dic per dreit qu'al drut non aperte Que l'o coman, anz faill, si no s'en cre! Que totz hom fai vas son amic engan, Si-l autreia so qe-il es malestan. Cosin, ben fora dreitz alor Aiso que vos rasonatz sai! Mas greu tenran l'amic verai Lo vostre conseill per meillor. Voletz auzir qe n'es dreitz en amor Aquel, ditz hom, que ama a bona fe, C'aitant viatz fai so que-is descove Cum zo que-is taing, sol sa domna l'en man! Car autra lei non teno fin aman. Si-l drutz conois sa deshonor, N'Elias, et encontra-ill vai, La domna l'en prezara mai, E s'el s'en fai comandador, Al meins pot dir: ieu ai domnejador, Que m'ama tant et en tant pauc mi te, Que soffrir vol d'autre que jassa ab me Doncs pren el dan et anta comandan, E defenden non pot mais penre dan. |