prosody | miscellaneous |
Ara-m digatz vostre semblan, N'Elias, d'un fin amador C'ama ses cor galiador Et es amatz ses tot engan! De cal deu plus aver talan Segon dreita razon d'amor: Que de sidonz sia drutz o maritz, Qan s'esdeven qe-il n'es datz lo chausitz Cosin, cor ai de fin aman E non ges de fals trichador, Per q'ieu tenc a major honor Aver dompna bella-e prezan Totz temps, que si l'avia un an! E pren marit dompnejador Que de sidonz sia totz jorns aizitz! C'autres dompneis ai mains vegutz partitz. La ren per c'om vai meilluran, N'Elias, tenc eu per meillor, E cella tenc per sordeior, Per c'om vai totz jorns sordeian! Per dompna vai bos pretz enan E per moiller pert hom valor, E per dompnei de dompna es hom grazitz E per dompnei de moiller escarnitz. Cosin, s'amassetz tan ni qan, Vos hi agratz dich gran follor! Que ren non cost'a fengedor, Si n'a un plazer e pois n'an! Per q'ieu vuoil remaner baisan Ab midonz, cui am et ador! Que per bon dreich n'iria pois faiditz, Si, qan mi vol, eu l'en era falhitz. N'Elias, s'ieu midonz soan Per moiler, no-il fatz desonor! Q'ieu non la lais mas per paor E per honor qe-il port tant gran! Que s'ieu la pren e pois la blan, Non puosc far faillimen major, E s'ieu li sui vilas ni deschausitz, Faill vas amor, e-l dompneis es delitz. Cosin, be-m tengatz per truan, S'ieu puosc aver ses gardador E ses parier e ses seignor Lieys que pus vuelh, s'alre deman! Maritz a son joi ses affan E-l drutz l'a mesclat ab dolor: Per q'ieu am mais, cals qu'en sia lo critz, Esser maritz gauzens que drutz marritz. A Na Margarita-m coman, N'Elias, cum a la meillor, Que jutge-l plait et eu sia aunitz S'ieu plus non am midonz que sos maritz. Cosin, ben sai q'ella val tan Qu'il sap jutgar un plaich d'amor! E car sos pretz es tant fis e chausitz, Sai qu'il dira que vos hi etz faillitz. |