prosody | miscellaneous |
N'Elyas, conseill vos deman De lieis c'am mais c'autrui ni me, Qe-m ditz qe-m colgara ab se Una nuoich, ab qe-il jur e-il man Que non la fortz part son talan, Mas q'eu estei baisan tenen: Del far digatz m'al vostre sen, S'es mieils c'aissi sofra et endur O part son voler me perjur N'Aimeric, e-us vauc conseillan Que, s'ab si-us colga, faitz l'o be! Car qui sa dompna en son bratz te, Fols es, s'aillor la vai cercan! . . . . . . . . . . . . . . . . . . . . Car s'ieu era ab midonz jazen E n'avia faich sagramen, Faria l'o, so-us assegur, Qui que m'en tengues per perjur. N'Elias, a lei de truan Me conseillatz er et ancse! Mal a qui del conseill vos cre, E sai ben qe-il fals vos creiran, Cill que non amon tan ni qan! Car Dieu e sa dompna eissamen Pert qui aisso qe-il jura men, Per q'al tenen baisan m'atur, Ab cor que del far non perjur. N'Aimeric, vilania gran Dizetz e rasonatz desse! Car s'ab lieis jatz q'am mais que me, Ja als non l'irai demandan! Mas bellamen rizen jogan L'o farai, puois plorarai m'en Tro qe-m perdon lo faillimen! Puois irai pelegrins part Sur Queren Dieu perdon del perjur. |