| |
|||
| prosody | miscellaneous |
N'Eble, er chauzetz la melhor Ades segon vostr' escien: Lo quals a mais de pensamen E de cossirier e d'error, Selh que gran re deu, e payar No pot, ni-l vol hom esperar, O selh qu'a son cor en amor Et en domna, mas re no-l fai que-il playa Chausetz d'amdos, qu'ieu sai quals plus s'esmaya. Guillem Guaysmar, anc per amor No trays hom piegz, de mon joven Cum fatz et ai fait, et enten Ni mais deya de ma ricor. Per qu'ieu sai, cum per assajar, Que no se fai a comparar Neguns mals a dolor d'amor! Mas non es hom en tot lo mon pietz traya, Com selh cuy ditz quascus: paya me, paya N'Eble, tuit li dompneyador, Li pro e-l larc e li valen, Seran ab mi del jutjamen! E ab vos seran l'uchador, E l'autra gens que no sap far Mas can tener et amassar. Mout vos da deutes gran paor, Per que se tanh qu'en son velhenc dechaya Ricx hom tosetz qui per deute s'esmaya. Guillem Guaysmar, quan li deutor Mi van apres tot jorn seguen, L'us me tira, l'autre me pren, E m'apellon baratador, Yeu volgr' esser mortz sens parlar! Qu'ieu no-m aus en plassa mostrar Ni vestir bos draps de color, Quar hom no-m ve que sa lengua no-m traya! E s'ieu d'amor trac mal, be-s tanh que-m playa. N'Eble, sapchatz que la dolor D'amor tenh major per un cen Que deute ni nulh sagramen! Qu'ab belh dir pot hom son deutor Gent aplanar et apayar, Mas amors qui-m fai sospirar, Morir e languir ab dolor, N'i ai poder per ren que m'en estraya,-- Tan tem morir, sol la dolors m'esglaya. N'Eble, ben sabon li pluzor Qu'om endeutatz no mor, sol manjar aya, Mas d'amor mor plus leu que d'autra playa. |