prosody | miscellaneous |
Ja non cudiei trobar Qi-m pogues restaurar Los dans c'avia pres! Anz volia jurar Que no m'entrameses D'amor, ni chanson non fezes! Mas vos, dompna, cui ai chausida, Etz tant de gran valor complida, Que-l mal c'ai pres et atretan Podetz restaurar: per que chan. E non avetz mais par Qe-m pogues joi donar, Ni don ieu lo preses! Mas vos mi faitz chantar, Car sol m'avez promes Capteing, don serai, doussa res, Rics et honratz mais a ma vida, E vos, per mainta gen grazida! Que bos capteins fai honor gran A celz qe-l prendon e qe-l fan. Dompn' en luoc de prejar Am fort e sai celar E grazir mals e bes, E solia-m clamar De mal, si m'avengues! Mas non serai mais descortes Per malvaza gen eissernida, Ni no-s taing, que tal vos ai chausida Que pauc ni pro no-i a d'engan, Anz semblatz del cor lo semblan. E ja no-m cal doptar Per huoill que m'en esgar Ni per ren c'anc vengues, E sol hom ben gardar Sa plaia! tals vetz es-- Aisso-m fai lo dolz mals cortes-- D'amor, q'es d'aital escarida, Que can nafra d'una partida, Sana puois, et a-m nafrat tan, Que garit m'a del mal d'antan. D'aitan m'en puosc lauzar C'ab rir' et ab jogar, Ses plus--c'anc no n'aic jes-- M'avetz faich oblidar Lo desir e-l mal pes De lieis que no m'amava jes! Car al sieu tort m'era faillida. Mas plaia, pos es tost garida, Torna ben maintas vetz a dan, E sobre tot plaia d'aman. Pros Comtessa, totz lo mons crida Que vos non fesetz anc faillida, Anz semblatz,--per q'ieu vos am tan,-- Per un pauc cella don ieu chan. |