Fuilhetas, vos mi preiatz qe ieu chan,
Pero non hai ni seinhor ni vezi,
D'aqest afar aia cor ni talan
Ni vueilha ges q'en chantan lo casti
Mas vos o tenes a joia
Amta ab pro mais qe honor ab dan,
E aves mal chauzit, al mieu semblan.

La raucha vos, don cridaz en chantan,
E.l niegre cors don semblas Sarrazi,
E.l paupre mot que dizes en contan,
E qar flairaz sap, e gema, e pi
Con avols gens de Savoia,
E qar es lag garnitz e malestan,
Ab qe.us n'anes, farai vostre coman.

Ara parra de prez qals l'a plus gran
De totz aqells qi.s leveran mati:
Mesier Conratz l'a plus fin ses enjan,
Qe.s defen lai a Sur d'en Saladi
E de sa mainada croia.
Dieus l'acorra qe.l secors vai tardan.
Sols aura.l prez, pos sols suefre l'afan.

Mesiers Conrat, a Jesu vos coman,
Q'ieu fora lai ab vos, so vos afi,
Mas laissei m'en qan vi qe li plus gran
Si croicavan, li rei e li prinsi.
Pueis vi midons, bell'e bloia,
Per qe mos cors mi vai afreollan.
Lai for'ab vos, s'ieu en saupes aitan.

D'en Oc e No mi vauc ara duptan,
Qar peza li, si nuilha re.l casti!
E.l reis franceis vai si trop apriman,
Ez ai paor qe veinha sobre mi!
Mas anc al seje de Troia
Non ac tan duc, prince ni amiran
Con ieu ai mes per chantar a mon dan.

A mon Ynsombart part Troia
Vai, serventes, e di li.m, q'ieu lo.l man,
Q'als reis crozatz es amta qar non van.